اِمشو مه دل خو نشونه چنده پَلی پلی وونه
اتی انار دل وشا ، اتی ترش هلی وونه
دار کوتن واری اتی،می سرره هی کوتندنه
اتی مه ور پر کشنه مه وسسه پاپلی وونه
اتتا گدر غزل وونه ،سینه ره رنگ و بو دنه
اتتا گدر شونگ کشنه ،لینگ بن تلی وونه
اتتا گدر چراغ سو اتتا گدر کلاغ شو
اتتا گدر مه دشت لو ،کوتر چنبلی وونه
خوامبه اتی گپ بزنم کتارره مه قد دنییه
زلف کفن چتی مه دل، عقده ی مه گلی وونه
انده مه تننه تش دره انده مه دل له تو دره
شو تا صوی مه خسسه دیم اسری جا قلی وونه
ته دنی وتسسه مه دل روز و شو ر نشناسنه
ته دنی وخننه مه ور، اتتا ززم کلی وونه
شعر : ذبیح اله ذبیحی