اِفتاب سوسو

اِفتاب سو سو

بی ته افتاب سو سو رِ چه فایده

بی ته ماه تی تیِ ، رو  رِ چه فایده

بی ته چه فایده تِرتِری (قمری) بخونده 

بی ته رازقیِ بو رِ چه فایده

هرشو تی قاب عکس کشه زمبه

خروار خروار غصه ر رجه زمبه

تی بورده راه ر اسلی و مجیک جم

لس لس امبه و کاب جم وجه زمبه

کجه آخر تره منزل هدانه

تره خارشتی سفت گِل هدانه

بدوتنه ته تن متخال اعلا

می تن سیو بدوته جل هدانه

یکسالِ راه درِ می چش ننی چه

دل ر تش زمبه نال پش ننی چه

اتتا وا هم ننه بواشه در واز

می دل بهیته ترکونش ننی چه

کورمال کورمال امبه آدرس کجوئه

تی سرد دیم جل دوس کجوئه

بواشم چلچلا بی یم تی سامون

اتتا آدرس هاده قفس کجوئه

اینتا کیجا ته وسته برمه کانده

اونتا تنها ته وسته برمه کانده

تی حال پرسنّه جواب چی باورم

زنا سیوا ته وسته برمه کانده

#روح_اله_نظرنژاد_کدخدا 

@nazarnezhad_kadkhoda2

رعنا-آهنگ مازندرانی

[از کانال رسمی داوود کیاقاسمی]

#رعنا

یک آهنگ قدیمی مازندرانی

خواننده: #علی_اصغر_رستمی

آهنگسازی و تنظیم: #مجید_رئیسیان

ترانه سُرا: #داوود_کیاقاسمی

آلبوم: #مشتی_پلوری، #همنوازان_ماهان

تهیه: #ساری، #سارو_صدا

سِرخه جِمِه شه گیس ره رج هاکرده

دیاری بمو گِس ره کج هاکرده

جِدایی خونش سرهدا و بُورده

گمون کمّه مه جا وِ لج هاکرده

رعنا! ته وسّه هر کِجه زمّه پا

شِه جان و تن ره کمّه ته رونِما

سِرخه جِمه! سرخه گلِ بو کِنّی

دیاری دَشونی دل ره او کِنّی

ته دیم اِفتابِ تابونه، بِنازم

نشو نشو که مِه روز ره شو کِنّی

رعنا! تِه وِسّه هر کجه زمّه پا

شِه جان و تن ره کمّه ته رونما

سرخه جمه! سرخه گلِ بی تَلی!

تِه دا بَوِّم! برو هنیش مِه پَلی

برو تا عاشقونِ ونگ و وائه

سرهادیم عاشقی گَلی به گَلی

رعنا! تِه وِسه هر کجه زمّه پا 

شِه جان و تن ره کمّه تِه رونما...

#داوود_کیاقاسمی 

@DavoodKiaghasemi

غدیر

غدیر

غلام غمزه ی ته نازنین نگارِ غدیر
دل ِ قرار ِ بوردی آ بی قرارِ غدیر

به اون خدا که هاکارده تی سینه ر ِ روشن
ته داغ عشق جه هنتا ونوشه زاره غدیر

جهاز دچینه, بورده, ته دست تا خورشید
نماز اول وقته تی انتظار غدیر

نا من که جن و ملک گانّه مدح مولا رِ
بهشت سینه ی مولا ر ِ دوستدار غدیر

فقط لیاقت تی دست داشته پیغمبر 
جهاز که جمع بهیه ،هارش تینار غدیر

غدیر برکه نیه گت تر هسته دریا جم
به اتتا تپه ی اون خم امیدوار غدیر

بلند باوته شه دل جم ,به زاده ی کعبه
هارش هارش که فقط با علی(ع) براره غدیر

#نظرنژاد_کدخدا

@Nazarnezhad_kadkhoda2

 

قربان

‍ عید قربان 

بَیْ خِرتیکِ، می دل خوانه قروون تِه باوه

وجّهتُ...بخوندسمه، اَرمون تِه باوه

سبزه جلِ دیم وَندنی ،می چشِ نَویندی

می واری کی مجنونِ،که بندون ته باوه

روبند وِشا کاندی می دل باوّه اَل عاقل؟

می لوچه ر نَم زَندی غزلخون ته باوه؟

بی صاب بهی دل ،اینتی شه ر بزّو به اون راه

سر تی ساخِ سَر یِلنه شو، مهمون ته باوه

کی بونه تی روبند بِنِ اتتا کش هارشم؟

صد تا رونما دِمبه دل افسون ته باوه

عید هسته و مردم گو آ گوسفن کانّه قربون

 کِی بونه که این خسته به قربون ته باوه؟

کیْ طعنه بزوئه که مه حرفا همه حرفِ

جان یارمه ته وسته، خوامبه ارزون ته باوه

@nazarnezhad_kadkhoda2

  تقدیم به امام زمان(عج)

شاعر:

#روح_اله_نظرنژاد(کدخدا)

عید قربان

عید قربان 

بَیْ خِرتیکِ، می دل خوانه قروون تِه باوه

وجّهتُ...بخوندسمه، اَرمون تِه باوه

سبزه جلِ دیم وَندنی ،می چشِ نَویندی

می واری کی مجنونِ،که بندون ته باوه

روبند وِشا کاندی می دل باوّه اَل عاقل؟

می لوچه ر نَم زَندی غزلخون ته باوه؟

بی صاب بهی دل ،اینتی شه ر بزّو به اون راه

سر تی ساخِ سَر یِلنه شو، مهمون ته باوه

کی بونه تی روبند بِنِ اتتا کش هارشم؟

صد تا رونما دِمبه دل افسون ته باوه

عید هسته و مردم گو آ گوسفن کانّه قربون

 کِی بونه که این خسته به قربون ته باوه؟

کیْ طعنه بزوئه که مه حرفا همه حرفِ

جان یارمه ته وسته، خوامبه ارزون ته باوه

@nazarnezhad_kadkhoda2

  تقدیم به امام زمان(عج)

#روح_اله_نظرنژاد_کدخدا

غزل: طواف

طواف

یک شو بِرا تنگِ دلِ ور طواف هاکان/
خاسّی نِئی باور مِرِ، اعتراف هاکان

سرما بَخوردمه اَشون, ناو دِراغ گانی/
شه گرم ِ دست ِ می دل کندا, لحاف هاکان

یا می تنِ توو ر بَهیر اتتا نازِ جِم/
یا که رَسن بیار و می گردن طناف هاکان

بوسّه تِروک بَهیمه ،غم جه بهیمه ساک/
یکشو ننا ر ناورُ بِرا اَی خلاف هاکان

می پشت سر ,تی پلی ,اَی صفه درِه/
گهت برارِ, سَرتپ وِن سر اضاف هاکان

انگورِ تیم , بهیه پِتکا, کِلا کِلا/
 بَیّه شراب, می لوچه ر ,وِن جِم معاف هاکان

گوش بر غولی دنی ,ته رِ هی زَمبه من صدا/
این اولین خوش هسته, برا دست لاف هاکان

اُوسّی هاکاردی اَی اَلسکین ،تا بِلخ بِن/
لیمو تی تی اِسبه دلِ سَر سِجاف هاکان

وَسّه دیگه, اَنده دواره کلک نَشو/
امشو بِرا ,حساب قدیمار صاف هاکان

#روح_اله_نظرنژاد_کدخدا

@nazarnezhad_kadkhoda2

#برگردان
یک شب بیا به دور دل تنگم طواف کن/میخواهی نیایی بگو به من اعتراف کن
سرما خوردم نگو که دروغ میگویم/ دست گرمت را لحاف روی دلم کن

یا تبِ تنم را بگیر با یک ناز دستت /یا طناب بیاور و دور گردنم طناب دار کن
بی تاب و توان شدم از غم خشک و لاغر شدم/یک شب به مادرت نگو بیا و خلاف دستور مادرت انجام بده

پشت سرم پیش تو پر از بدگویی است/روی اینها اضافه کن سرکوفت برادرت را

دانه دانه انگور, خمره خمره, خیله پخته شده /شراب شده , مرا از خوردنش معاف کن

خودت را به نشنیدن می زنی, من ترا مرتب صدا میکنم/این اولین بوسه است بیا دشت اول را بکن

آستین را بالا زدی, تا انتهای انتها /شکوفه لیمو به روی سینه سپیدت قرار بده

بس است دیگر , دوباره جِر نزن /امشب بیا حساب های مانده گذشته را پرداخت کن

#برگردان_کدخدا

@nazarnezhad_kadkhoda2

رباعی(1)

رباعی

یارب مِره روزه دارِ شِه نور هاکان

می دل دله ،عافیت ر پِلغور هاکان

تا صُب نَخاتی کشمبه آی در بَزنی

این نخاته دل همسفر ثور هاکان

شعر : روح اله نظرنژاد(کدخدا)

پلغور= پُر

ثور= اشاره به غار ثور در زمان هجرت پیامبر(ص)

بوی کوثر

روجینِ واز هاکان دنیار هارش/ مازرونِ خوارِ هوارِ هارش

بِمو نوروزخون آ سُرنا بدسته /مِقوم ونگِ لَله وارِ هارش

اِسبه بِنه بَهیه سَبزه ماریم / چپون هیرا وآ هیرا ر هارش

دَپوشته پشمالی سَر، سِرخ مِکنا / کاج دارِ بِن زردِکیجا هارش

زُولنگ و سِرسم بو اَی دَپیته / لِسِکِ دست مِجی لِتکار هارش

دَکارده  چِل و چو، سبزه جِلزقه /هوکا بدوش ببا، ننا ر هارش

تَجن پلغور بَزو بِمو تا ساری/ تلا جی ی پائین بالا رهارش

ماهی بتیم دله مشت هسته اشپل/ سالیک بشندیما دریا ر هارش

  دواره لینگ چی شالی بنه سر/ کایر زحمت نشا ر هارش

عسل ماز شه بتیم مِ پر هاکارده/ دشت دله زرد کُلزا ر هارش

اتتا برار عاروس بیته ریکا و / اتتا برار بیته زوما ر هارش

لَله وای نفس(استادطیبی) رِ وا بورده/ مه گوش هنتا اِنه صدار هارش

تی بُوردن بُوردنا مه هارش هارش/اَتی تند تند شونی کفا رهارش

امسال باهار کوثرِ بو رِ دارنه/ خدیجه ی(س) چکه سما ر هارش

 

 

روح اله نظرنژاد-(کدخدا) 

یا فاطمه (س)

خوامبه تی دل ، مه جا رضا بَواشه/تی گَهت دل ،فقط مه جا بواشه

اگه قبول هاکانی، اَی دَواشیم/ته لطف جا ،کُور گِره ،وا بواشه

کی خوانه اَی سازه بَهیره دل  ر/گرمِ تنور سَر دلا بواشه

تی دستار ِ اگه بَهیره سردی/کی خوانه زینب نِنا بواشه

محمد(ص) و علی (ع)حسین(ع) و حسن(ع)/چادر بن چتر کِسا بواشه

نِخامبه این دِ روز عمر دنیا/ته لطف اَمه دل جه سیوا بَواشه

تِه قبر سَر شه دل ر لَت کَشمبه/قبر نشون اگه پی دا بَواشه

 #نظرنژاد_کدخدا 

@nazarnezhad_kadkhoda2

لمپا

مه دل لمپای واری کانده پک پک

همین گوشه کنارا کانده رک رک

شه همراکت بیاردی رازقی بو

اسا خنده بمو در زنده تک تک

#روح اله نظرنژاد_(کدخدا)

****

بَزن لَله ،که نا شو دارمه نا روز
ته لَله وایِ وا جه، دل گِرنه سوز

بلارم تی نفس رِ ، تی گلی ر
خوش هادم تی گلی سَرِ هَلی ر
١٣٩۵/۰٢/١۰
#نظرنژاد_کدخدا
@Nazarnezhad_kadkhoda2

ته لس لس شونی و
من امبه ته پس
نشو پیش پیش
ته خاهونمه در بس
ته لینگ رج هارش
 هنتا دیاره
گرمه کل بز راه ر
 امبه لس لس

#نظرنژاد_کدخدا